Florent Vollant

Takuana ka mishkutshipaniti eshpaniti menutakuaki mak menueuepitakaniti. Ne auen nikan ka tat anite peikᵘ e mishkutshipannit eshpannit ishinikashu Florent Vollant. Tshikaueu e uauitak e inniunanunit, ka nishiht mamu e tauapekaitsheht ka ishinikatenit Kashtin, mishta-uauitakannipan anite uiauitakanit ka nikamunanut Uepishtikueiau-assit mak ekue mishituepanitapan ait assia aimunnu mak ka ishinniunanunit meshta-uenutishimakaki ashit eka menu-nishtuapatakanniti. Tutamᵘ nikamuna mak etueuemakanniti, nikamu, nikan aimu, uauetineu katauapekaitsheshiniti mak kanikamushiniti, takuaimatamᵘ atusseunnu etutakannit, uauetinamᵘ e tutakannit tshekuannu mak tshimatau ka ashupaniakanniti auennua. Matau-pikutau kie Florent Vollant : ashit nenu metikat nekamut mak shiutshishimakannit utaimuna, tshi tutamᵘ tshetshi itshepannit eka ka apatenitakannit tshekuannu mak tshetshi nukuannit uitshinnua utipatshimunnua eka ka ui uitakanniti.

Eshi-mishkuenitak tshekuannu, eshpish shutshenitak mak shutshishimakannit etusseshtak tshekuannu, tutamᵘ tshetshi nashauakanit. Nenu aitit mak eshpish eka manashtat, minepan aimunnu, pakushenitamunnu mak ashineunnu ka auassiuniti innu-katauapekaitsheshiniti mak innu-kanikamushiniti. Ui mamuneu auennua ne ka itatusset tshetshi minupanitat, atusseshtamᵘ tshiamenitamunnu mak nanitam tau netuenitamuakanit tshetshi patshitinak utshissenitamun, eshi-kanuenitashut kie ma tshetshi uitak etenitak. Mishta-tshishpeuatamᵘ utinnu-aitun mak eshi-takuannit tshitassinat, apu tshi tipannakaniti e nishiniti iu. Tshitshissiumikunan nenu ka ishi-nikamuht innuat, tapueienitamun anite takuan mak utshipanu anite puamunit. Nenu puamunnu etutak tshetshi tshitshue ishinakuannit.